Dies und das auf Halterner Platt
De meesten Mannslüe van us sind sick ennig, dat Fraulüe so tüsken
diärtig un vettig, manksen ook no büs üöwer füftig, besünners schöen
un ansaihnswärt sind. Ick kann dütt kritiske Urdeel bloß biplichten.
In mien rieperet Oller dra ick mi jao wull een salomonisket Urdeel
in socke Fraogen erlauben. Natürlick gi t ook bi düsse Fraulüe in de
allerbesden Jaohren socken un socke. Wann wi ählick sind, nich alle
sind so schöen äs Mona Lisa o Heidi Klum. Aowwer de weiblicke
Charme mäck ook bi dehen allerhand wett, de villicht een lück te
kuort kuomen sind, äs usse leiwe Härrgodd Schöenheit un Anmut
verdeelt hätt.
Ick girf jao to, dat is eene typisk männlicke Macho-Instellung. Fraulüe
sölwst denkt, wat ähre Schöenheit angaiht, meest ganz anners äs wi
Mannslüe. No virl kritisker. Jao, de meesten sind met ähr Utsaihn
liärbenslang gar nich tefrirden. Se versöekt et met Schminke un met
Puder un met Diäten, hä t alle Niärse lang ’ne annere Haorfarwe un
laot’t keenen Versöek ut, üm sick te verännern.
Alleen dat Gedohe ümde Punde un Kilos,we se te virl o an de falsken
Stiärn sitten hä t! Eene ganze Industrie liärft daovan, usse Fraulüe
ümmer niee Diäten un Kuren antedraien. A theken, Parfümerien,
Reformhüser un Drogeriemärkte maakt bi de Schöenheitswelle met
un verdaint sick dumm un dämlick an düsse Marotte van de holde
Weiblickkeit. „We muorn all eene Bikini-Figur häbben will, de nimp
dat Middelken xy.“ Wi kennt düsse Sprüeke ut’t Werbefernsehn.
Ennige Damen fallt aowwer ook würklick up alle Quinten un
Quacksalwerien rin. So äs eene jüngere Bekannte van mi, Anita
met Naomen. Se hätt nu wahrlick keenen Grund, met äöhre Figur
nich tefriärden te sien. Wo wat sitten mott, dao is bi äöhr ook wat te
saihn. An ennige Stärn mähr, an annere wenniger. Up alle Fälle keen
Grund, üm sick sölwst te quiärlen un te kasteien.
Aowwer Fraulüe denkt bi sowat nich ganz logisk. Un daorüm mäck
Anita nu siet ennige Wiäken eene Molke-Kur. Düsse Kur hätt se
in irgendeen Blättken bi’n Frisör funnen, un dat is nu för äöhr dat
Nonplusultra. Üm ährlick te sien, äs se mi dat vertellt hätt, häbb ick
irst gar nich wusst, wat „Molke“ eegentlick is. Se hätt mi upkläört, un
nu weet ick Bescheid: Molke süht so äs Miärlk, smeckt so äs Miärlk
ut un sall een A fallprodukt ut de Käserie sien. O van Kohmiärlk,
villicht sogar Schaops- o Hippenkäse, weet ick nich. Alle Suorten
sind för mienen Gesmack nich besünners appetietlick.
Aowwer Anita kennt keen Pardon, wann dat üm äöhre Bikini-Figur
gaiht. Se süpp nu all drei Wiärken lang Dagg för Dagg mährere
Pötte van dütt witte Molketüüg. Nao dat Gesicht, wat se daobie
mäck, kann et nich besünners gued smaaken. Män togirben döet se
dat nich. In’t Tirgendeel, se sägg, aohne daobie rood te wärn, Molke
wäör för äöhr eene Delikatesse.
Daomet nich genoog. Se drinkt ook no literwiese Sprudelwater.Twee
büs drei groote Pullen jeden Dagg. Ick an äöhre Stiär wäör bange,
dat ick van all dat Water Kesselsteen in’n Buuk kreeg. Manksen,
wann se an mi vörbie löpp, düch mi, äs wann ick all de Molke un dat
Bölkwater in äöhren Buuk kluckern häörn könn. Villicht beld’t ick
mit dat bloß in.
O de Molkekur all wat holpen hätt? Üm ährlick te sien, mi, wo ick
dock würklick eenen scharpen Blick för weiblicke Schöenheit häbb,
is no nicks upfallen. De Punde sitt’t bi Anita ümmer no dao, wo se
se wegg häbben will, wo se för mienen Gesmack aowwer henhäört.
Upfallen is mi allerdings, dat se nu bolle alle tein Minuten nao’t
Hüüsken löpp. Dat virle Water söch sick nu maol sienen natürlicken
Wegg, wat jao an sick een gued Teeken is. Män o de Natur sick up
de Duer met Molkekuren un socke Quinten in’t Handwirk fusken
lött, dao sin ick skeptisk. Villicht kümp Anita met de Tied dao ook
no drächter. Un wat nützt ähr all de Schöenheit un de slanke Tallje,
wann se daför den halwen Dagg up’t Hüüsken sitten mott?
Heinz Kallho
36
