42
Dies und das auf Halterner Platt
Inne lesde Tied konnen wi alle paor Dage inne Medien häörn o
saihn, dat wi bi de wiehnachtlicke Bescherung mürglickst Müll
vermeiden süllt. Düsse Idee is an sick gurd un richtig, wirl dat us
in usse Wuhrlstandsgesellschop de A fallbirge süss ürwern Kopp
wasst un wi wanners nich mähr wirt’t, wohen met den ganzen
Kraom.
Daobie gi ’t owwer Lüe unner us, we all ümmer met dat
Inpackgerai sparsam ümgaohn sind, ook äs no keeneene an de
Ümwelt dach. Düsse Menschken bereitet sogar dat wiehnachtlicke
Pack- un Inwickelpapeer bi sick ant Huus wier up. Un dat all siet
Jaohr un Dach, ook äs dat no gar nich so nöedig wass äs vandage.
Miene Naoberschke, de häört to düsse Surte Lüe. So lang äs
ick denken kann hätt se all Wiehnachten un bi Geburts- o
Naomensdage dat bunte Papeer, wo de Geschenke drin inpackt
sind, insammelt, glattstrirken un üm Gottswillen nich up’n
Müll schmirten. Nee, dat Papeer dra bi’t Utpacken nicht
kapottrirten wärn. Et wett bi ähr ürdentlick upfaltet un dann in
eenen Schohkarton in ähr Bessemschapp wechpackt. De bunten
Schliepen un Bänder, wo de Nikolaus- un Wiehnachtspäckskes
met tobunnen un dekoreert sind, de kurmt bi miene Naoberschke
ook nich nne Aschketunne. Nee, de rullt se süberlick up un döet
se in eene Trecke van äöhr Naihdischken. So is dat Gerai dann dat
heele Jaohr ürwer gurd verwahrt.
Nu in de vörwiehnachtlicke Tied, wann se sick dran gi , de grooten
un kleenen Präsente för ähre Leiwen intepacken, kraomt se dat
Papeer vant vörrige Jaohr wier ut dat Bessemschapp. Et is dann
wull een birtken knubbelig, män dat schatt nicks. Se mäck ähr
Bügeliesen heet. Daomet krich se dat knubbeligste Inwickelpapeer
wier glatt un schöen. Ook de Bändkes kurmt unner dat Plättiesen.
In Tied van nicks kann se daomet wier härrlicke Schliepen un
Rosetten terecht zaubern.
Nu weet ick jao no nich, o mi de Naoberschke düttjaohr wier wat
te Wiehnachten schenkt. Wann jao, dann könn dat gurd sien, dat
dat Päcksken jüst in dat sölwige Papeer inpackt is äs vörriget o
vör drei o veer Jaohr. Un et sall ook düttmaol wull wier so sien,
dat se mi dat Papeer forts nao dat Utpacken ut de Hänne nimp,
bineenfaltet un süberlick wechlech. Owwer et is mi ümmer no
leiwer, wann se mi dat Papeer wechnimp äs dat Geschenk.
Nu söllen wi nich meinen, dütt Gedohe üm dat Wiehnachtspapeer
härr wat met ähr Ümweltbewusstsien te dohen. Nee, dat nich. Dat
kümp wull mähr van ähre Sparsamkeit. Ümmerhen kann so een
Burgen edlet Wiehnachtspapeer wull een Euro füftig un mähr
kosten, häbb ick mi säggen laoten.Wann ick miene Naoberschke up
ähre Sparsamkeit anküer, dann vertellt se mi wat van de schlechten
Tieden nao’n lesden Krieg, we se all belirwt härr. Daomaols ga t
so gurd äs nicks, ook nich te’t Inwickeln. Dao wass ook een bunt
Stücksken Papeer vull wärt.
Van Wechwerfgesellschop hätt daomaols no keene küert. Un wann
ick mi dat richtig ürwerlech, et kümp jao eegentlick ook vandage
nich up de Upmaakung van een Geschenk an. Bloß de Inhalt is
wichtig un tellt. Un de Leiwe un gurde Geschmack, womet een
Geschenk utsocht is.Dao dran hätt se’t gottlurwno nie faihlen laoten.
Heinz Kallho
Wuhrlstandsgesellschop - Wohlstandsgesellschaft
A fallbirge – Abfallberge
Inpackgerai - Verpackungsmaterial
Bessemschapp – Besenschrank
Aschketunne - Mülleimer
Naihdischken - Nätisch
bineenfalten - zusammenfalten
Burgen - Bogen
Belirwen -erleben
gottlurw – gottlob/Gottseidank
