- Anzeige -
44
Stadt-Gutschein | 12. November 2016
Dies und das auf Halterner Platt
Mien Vader harr fröher faken eenen Sprurk drup, de gong so: „Wann
du ürwer füftig büs, murns wack wetts un et döet di rein gar nicks
weh – dann büs doot“. Ick häbb düsse Küerie van eenen öllerenMann
ümmer för een birtken makaber hollen un nich widders drürwer
naodacht.Män nu, wo ook usseene peu á peu in de Jaohren kümp un
mi a un to äs een Zipperleen plaogt, dao mott ick doch faststellen,
dat an Vaders Geküer van daomaols villicht doch wat dran sien könn.
Nich dat’ke nu jeden Murn harre Piene härr, un gau den Lirpel
a girben möch. Owwer a un to döet et mi doch äs een birtken
weh. Maol hier, maol dao, inne Butten, ächten in’t Krüüß, in’n
Buuk o süsswo. Nu will ick uh an düsse Stiär nich met miene
Krankengeschichten langwielen. Wobie ick säggen mott, dat mi
Kopppiene murns fröeh no met to miene leiwste Piene häört. Dao
weet ick wennigstens, wo se wechkümp. Näömlick van dat Beer an
den vörrigen Aobend.
Män wat döet usseene, wann de Piene anhöllt un nich birter wärn
will? He mäck sick up’n Patt nao’n Dokter un wocht’ dao gedüllig
stunnenlang inne Sprirkstunne. Dann, wann he endlicks anne Riege
is, klagt he den Halfgott in Witt sien Leed – un föehlt sick daonao
meest all wat birter. De Dokter weet meest, wat för den Patient
gurd un för em äs Arzt besünners gurd is. He kick dann bedenklick,
schüddelt den Kopp, tippt in sienen Computer rüm un schri antlest
Pillen up.
Gesundheitsreform hen o här, för jedet van miene Lieden gi t
annere Pillen. Van de Biepackzirdel will ick leiwer garnich küern. All
de Pillendöskes maakt de Saake för mi äs gewirtenhaften Kranken
nich eenfacker. Nich dat düsse Pillen un Middelkes allbineen nich
helpen daien, ennigen helpt mi tatsäcklick (un den A theker up alle
Fälle). Owwer wann ick ährlick sien sall,dannmäckmi dat Inniermen
van all dütt Gerai doch alle Dage Stress un Koppterbrirken. Ick mott
mi harre daobie konzentreern.
Murns forts nao’t Upstaohn de kleene girle Pille – nöchtern, met
wennig Water. Bit’t Fröehstüeck o forts daonao de groote Witte,
up eenmaol runnerslucken un üm Goddswillen nich kapottkaun.
Middachs dann de kleene Witte, owwer män bloß jeden twedden
Dach. Daoför aobends nao’t Irten eene halwe van de groote gröene
Tablette. Un vör’t Intberregaohn wier eene girle Pille. Owwer bloß
nich de van murns fröeh un ook dann nich, wann ick Alkohol
drunken häbb. Daorüm laot’ke düsse Pille vörsichtshalwer meest alle
Dage wech.
Ick weet nich o ih mi nu naoföehlen kürnt, dat ick met düssen
pharmazeutischken Dagesmarathon manksen ganz schöen döreene
kurm, mi faken äs met all de girlen, witten un gröenen Pillen verdoh
un se a un to ganz vergirt. Wat büs nu wull medizinischk bi mi no
keen grötter Malleur anrichtet hätt. Wann’t mi ook manksen äs een
birtken kodderich o binaut in de Buukgirgend wett.
Nu könn ick jao wier nao mienen Huusdokter loopen un mi villicht
Pillen tirgen dat Vergirten upschriewen laoten. Män daomet will’ke
leiwer no wat wochten.Dat Eene is mi in deTüschkentied klaor wurn:
Et is nich so licht, wann de olle Dach kümp. Ook wier socke Küerie
van Vader,met de he nich äs so unrecht harr.Düsse Insicht härr’ke mi
äs jungen Kärl vör tein o füftein Jaohr ook no nich dröemen laoten.
Heinz Kallho
Glossar:
Küerie - Gerede
Zipperlein –Wehwehchen
Butten – Knochen
Kopppiene – Kopfschmerzen
Sprirkstunne – Sprechstunde
Halfgott in Witt – Halbgott in Weiß (Arzt)
Biepackzirdel – Beipackzettel
Middelkes – Mittelchen
Intberregaohn – Zubettgehen
kodderich un binaut – unwohl und beklommen
Buukgirgend – Bauchgegend
Huusdokter - Hausarzt
Tüschkentied - Zwischenzeit
